*ಕನ್ನಡ ಕಸ್ತೂರಿ ಅಸ್ಮಿತೆ*
ನವೆಂಬರ್ ಮೊದಲ ದಿನದಂದು
ಶ್ರೀ ಭುವನೇಶ್ವರಿಯ ಪೂಜೆಯನು ಗೈದು,
ನಲಿದಾಡುವರು ಕನ್ನಡಿಗರೆಲ್ಲೆಡೆ,
ವಿವಿಧೆಡೆ ಹಳದಿ-ಕೆಂಪಿನ ಧ್ವಜವು
ಮುಗಿಲನು ಚುಂಬಿಸುತಿರಲು,
ಕವಿತೆ ಗೀತೆಗಳೆಲ್ಲೆಡೆ ಮೊಳಗಿ
ಹಬ್ಬದ ಕಳೆ ತರಲು...
ಕನ್ನಡ - ಅದು ಕೇವಲ ಭಾಷೆಯಲ್ಲ,
ಸಂಸ್ಕೃತಿ, ಭಾವಪರಂಪರೆ!
ಪ್ರಾಚೀನ ದ್ರಾವಿಡ ಮೂಲದ ಭಾಷೆಯು,
ಎರಡು ಸಾವಿರ ವರುಷಗಳ ಹಳೆಯದು,
ಧರೆಗೆ ಶಾಸ್ತ್ರೀಯತೆಯ ಮುದ್ರೆಯೊತ್ತಿದ ನುಡಿಯಿದು,
ಅರಸು ನುಡಿ, ಅಕ್ಷರಗಳೊಳಗೆ ಕಂಗೊಳಿಪುದು ಅಸ್ಮಿತೆ!
ಹಳೆಗನ್ನಡದ ಸೊಗಸಿನಲಿ,
ಕಾವೇರಿಯಿಂದ ಗೋದಾವರಿವರೆಗಿನ ಕನ್ನಡ ನಾಡು,
ಲಲಿತ ಕವಿರಾಜಮಾರ್ಗದ, ಹಲ್ಮಿಡಿ ಶಾಸನದ,
ನೆಲದ ಸಿರಿ, ಪಂಪನ ಕೃತಿಗಳ,
ಚೆಲುವ ರನ್ನನ ಗದಾಯುದ್ಧದ,
ಬಳಕೆಯೊಳು ವಿಹರಿಸುವ
ಗಂಭೀರ ಪದಬಂಧಗಳ ಸೊಬಗಿನ ನುಡಿಯಿದು!
ಜನನಿ ಕನ್ನಡ ಧರಣಿ ದೇವಿಯ
ಮನದಿ ಹರಸಿ, ಮಧುರ ವಾಣಿಯ
ಮನವ ತಣಿಸುವ ಕನ್ನಡ ಕಸ್ತೂರಿಯ
ಪರಿಮಳದ ಸವಿನುಡಿಯು,
ಅನಿತುಕಾಲದ ಚರಿತೆಯನು ಪಡೆದ
ಅನುಪಮದ ರಾಜಗಾಂಭೀರ್ಯ ಭಾಷೆಯ,
ನೆನಹೊಳೆವ ಜ್ಞಾನಪೀಠ ಮುಕುಟದ
ಭವ್ಯ ಹಿರಿಮೆಯ ಕೃತಿಯು!
ವಾತಾಪಿ ಚಾಲುಕ್ಯರು ಮೆರೆದಿಹ
ಕನ್ನಡದ ಬಾವುಟವು,
ಬಸವಾದಿ ಶಿವಶರಣರ ವಚನ,
ದಾಸರ, ಜನಪದ ಗೀತೆಗಳ,
ಕವಿನುಡಿ ಕೋಗಿಲೆಯಂದದಿ ಮಧುರ
ವಾಣಿಯ ಕಾವ್ಯಗಳ,
ಹಲ್ಮಿಡಿ ಶಾಸನದಿಂದ ಇಂದಿನವರೆಗೆ
ಜೇನಿನ ಹೊಳೆಯಂತೆ ಜುಳುಜುಳು ಹರಿಯುತ್ತಿರುವ
ಕನ್ನಡದ ಸಂಸ್ಕೃತಿ ಸುಧಾರಸ - ಅವಿಚ್ಛಿನ್ನ!
***************
ಶ್ರೀಮತಿ.ಸಂಗೀತಾ ಪ್ರಕಾಶ್.
ಡಾವಣಗೇರಿ.
